№3 қалалық емхана тек медициналық қызмет көрсетіп қана қоймай, қоғамда мейірімділік пен қамқорлық құндылықтарын да дәріптеп келеді. Алматы ауданының белсенді ұзақ өмір сүру орталығында «Жүректен жүрекке» атты қайырымдылық акциясы өтті. Шараны емхананың профилактика және әлеуметтік-психологиялық көмек бөлімі мен «Жас Толқын» жастар денсаулық орталығы ұйымдастырды.

Бұл күннің ерекшелігі – әр буынның бір залда бас қосып, бір-бірімен шынайы жылулықпен бөлісуі болды. А.К. Құсайынов атындағы Еуразиялық гуманитарлық институтының студенттері ән айтып, би билеп, жиналғандарға ерекше көңіл-күй сыйлады. Өз кезегінде орталықтың қызмет алушылары да өнерлерін ортаға салды. Әсіресе, жасы үлкен қатысушылардың сән көрсетілімі көрерменнің көңілінен шықты.

Осындай іс-шаралар жас ұрпақ пен аға буын арасында рухани көпір орнатуға сеп болады. Қарттар – қоғамның алтын қоры, ал жастар – болашағымыз. Екі буын бір-біріне қолдау көрсетіп, мейірім мен сыйластық танытқанда ғана шынайы, мейірімді қоғам қалыптасады.