Туберкулезге қарсы айлық аясында №3 қалалық емхана мамандары М.Жұмабаев атындағы Халықаралық жоғары колледжінде «Денсаулық қалашығы» форматында акция өткізді. Шара «Иә! Біз туберкулезді жеңе аламыз: міндеттенеміз, инвестиция саламыз, әрекет етеміз» деген ұранмен өтті.

Акцияның мақсаты – жастарға туберкулездің алдын алудың және ерте анықтаудың маңыздылығын еске салу. Бүгінде ақпарат ағымы көп, ал осындай жұқпалы ауруларға бейқам қарау – қауіп тудырады. Емхананың дәрігерлері, медбикелер, ЗОЖ мамандары мен психологтар студенттерге кеңес беріп, симптомдар мен алдын алу жолдары туралы буклеттер таратты.

Қалашық ішінде түрлі интерактивті аймақтар жұмыс істеді: қан қысымын өлшеу, дене массасының индексін есептеу, тамақтану және салауатты өмір салты бойынша кеңестер берілді. Иммунитетті нығайту мен флюорографияның рөліне ерекше назар аударылды.

«Бүгінгі жастар белсенді әрі ашық. Сондықтан біз оларға түсінікті тілмен сөйлеуіміз керек. Мұндай шаралар тек қауіптің алдын алып қоймай, денсаулыққа жауапкершілікпен қарау әдетін қалыптастырады», – дейді мамандар.

Кездесу соңында студенттермен ашық пікір алмасу өтті. Олар өз ойларын айтып, маңызды сұрақтар қойды.