Астана қаласындағы №3 қалалық емханада денсаулық тек физикалық күй емес, ол — рухани тұтастық, өмірге деген сенім мен ішкі тұрақтылық екенін жақсы түсінеді. Осыған орай, «Жас Толқын» жастар денсаулық орталығының психологы Диана Ильяшова «Ұрпақтан ұрпаққа» атты тренинг өткізді. Іс-шара Медико-техникалық колледж студенттеріне арналды.

Тренинг барысында жастар отбасындағы дәстүрлер, үлкенге құрмет, отбасылық құндылықтардың сақталуы, мәдени сабақтастық туралы ой бөлісті. Заманауи өмірдің жылдам өзгеріп жатқан ағынында ұлттық болмысты сақтау жолдары да қызу талқыланды.

Студенттер өз отбасы тарихынан мысал келтіріп, әжелері мен аталарының ақыл сөздерін еске алды. Бұл жаттығулар олардың бойындағы жауапкершілік пен алғыс сезімін нығайта түсті.

Шара соңында қатысушылар рухани байлық пен ұрпақтар сабақтастығының адамның психологиялық саулығына оң әсер ететінін атап өтті. Мұндай кездесулер жастарға өзін танып, өмірге сеніммен қарауға сеп болады.