Қыз балалардың денсаулығы – қоғам үшін аса маңызды мәселе. Осыған орай №3 қалалық емхананың «Жас Толқын» жастар денсаулық орталығының гинеколог дәрігері Сервис және туризм колледжінің студент қыздарына арналған «Репродуктивті денсаулықты сақтау. Ерте жүктіліктің және ЖЖБЖ-ның алдын алу. Контрацепция әдістері» атты тақырыпта семинар өткізді.

Көптеген жасөспірім қыздар өз ағзасы, жыныстық денсаулығы туралы дұрыс әрі ғылыми негізделген ақпаратқа қол жеткізе бермейді. Бұл семинар – ашық сұрақтар қойып, маманнан нақты жауап алуға мүмкіндік берген еркін диалог алаңы болды.

Дәрігер ерте жүктіліктің физикалық және психологиялық зардаптарына, жыныстық жолмен берілетін аурулардың белгілері мен алдын алу тәсілдеріне жеке тоқталды. Сонымен қатар, контрацепцияның қауіпсіз әрі қолжетімді әдістері егжей-тегжейлі түсіндірілді.

Мұндай кездесулер қыз балалардың өз денсаулығына жауапкершілікпен қарауына, дер кезінде дәрігерге жүгінуіне ықпал етеді. Бұл – сау әрі саналы ұрпақтың негізі.